Скопје, 22 јуни 2011 (МИА) - Во Собранието на Република Македонија денеска напладне ќе се одржи подготвителен состанок во пресрет на одржувањето на конститутивната седница на новиот состав на македонскиот Парламент.
Претседателот на Собранието Трајко Вељаноски на средбата побара да присуствуваат претставници од ВМРО-ДПМНЕ, СДСМ, ДУИ, ДПА и НДП, а поканет е да учествува и најстариот пратеник во новиот состав Љубисав Иванов Ѕинго, кој ќе ја води седницата.
Законскиот рок за одржување на конститутивната седница на Собранието истекува во сабота на 25 јуни.
Државната изборна комисија (ДИК) денеска ќе ги издава решенија на новите пратеници.
На предвремените избори, што се одржаа на 5 јуни најмногу пратеници освои коалицијата предводена од ВМРО-ДПМНЕ 56, СДСМ 42, ДУИ 15, ДПА 8 и НДП 2.