Верификувани мандатите на новите пратеници во Собранието на Р.М

Скопје, 22 јуни 2011 (МИА) - Собранието на Република Македонија на денешната прва конститутивна седница едногласно ги верификува мандатите на новите 123 пратеници во законодавниот дом.

Предлогот за верификација на мандатите го даде Верификациската комисија, формирана на денешната конститутивна седница, по разгледувањето на извештајот на ДИК со конечните резултати од парламентарните избори на 5 јуни.

Со верификацијата на мандатите, на пратениците кои се членови на Владата или извршуваат други функции им престанува досегашната функција.

На дневен ред на седницата што ја води најстариот пратеник Љубисав Иванов од Социјалистичката партија, покрај избор на претседател и членови на Верификациска комисија и верификација на мандатите на новите пратеници, се и избор на членовите на Комисијата за избори и именувања и изборот на претседател на Собранието.

Ова е седми состав на Собранието од независноста на Република Македонија во 1991 година, и прв што ќе брои 123 пратеници.

Првпат во собраниските столчиња ќе седат тројца пратеници од дијаспората откако македонските државјани во странство добија право глас, а дел од нив и го остварија на предвремените парламентарни избори на 5 јуни.

Најмногу пратеници на вонредните парламентарни избори освои коалицијата предводена од ВМРО-ДПМНЕ 56. Коалицијата предводена од Социјалдемократскиот сојуз на Македонија (СДСМ) доби 42 мандати, Демократската унија за интеграција (ДУИ) - 15, Демократска партија на Албанците (ДПА) - 8 и Националната демократска преродна (НДП) - двајца. Првпат во Собранието ќе седнат и двајца пратеници на НДП, чиј лидер е Руфи Османи, еден од оние на листата на градоначалници кои се откажаа од своите мандати.