Скопје, 27 јуни 2011 (МИА) - Полициските службеници од Полициската станица за гранична проверка „Богородица“, претпладнево биле известени од колегите од грчка страна кои работат на граничниот премин „Евзони“ дека почнувајќи од полноќ, истите ќе стапат во 48 часовен штрајк.
Освен полицијата, според најавите, соопшти денеска МВР, во штрајк ќе стапи и царинската служба на граничниот премин.
Согласно известувањето, во наредните два дена на граничниот премин Богородица-Евзони, од грчка страна воопшто нема да се пропуштаат автобуси и товарни возила, додека патнички моторни возила можно е да се пропуштаат на секои два часа.
Заради новонастанатата состојба, Министерството за внатрешни работи на Република Македонија, се подвлекува во соопштението, ќе ги преземе сите неопходни мерки за насочување на сообраќајот кон граничните премини „Стар Дојран“ и „Меџитлија“.
МВР апелира, сите граѓани и туристички агенции кои наредниве два дена планираат да патуваат за соседна Грција да имаат трпение и да го почитуваат режимот на сообраќај.