Атина, 19 јули 2011 (МИА) - Постојат шанси за решавање на спорот за името на Македонија, кој ги оптоварува односите меѓу Скопје и Атина, изјави американскиот државен секретар Хилари Клинтон во интервју за грчката телевизија Скај.
- Јасно истакнуваме дека ги поддржуваме преговорите меѓу Скопје и Атина. Сметаме дека тие преговори нудат можност да се реши спорот, истакна Клинтон.
Американскиот државен секретар истакна оти е јасно дека Македонија нема да може да стане членка на ЕУ се додека не биде решен овој проблем и ја повика Грција да покаже подготвеност за компромис.
Клинтон во неделата допатува во посета на Атина, како дел од нејзината 12-дневна дипломатска турнеја, која ќе трае до 25 јули. Пред Грција, Клинтон ја посети Турција, каде учествуваше и на состанокот на Контакт групата за Либија во Истанбул, а од Атина таа денеска заминува за Индија, по што ќе ги посети и Индонезија, Хонг Конг и јужните делови на Кина.