Скопје, 26 јули 2011 (МИА) - Во Основниот суд Скопје – 2 денеска привремениот стечаен управник на А1 телевизија Ацо Петров предложи да се отвори стечајна постапка за телевизијата.
Според него отворањето на стечајната постапка е неопходна бидејќи телевизијата има долг од околу 30 милиони евра од кои 9,5 милиони евра кон Управата за јавни приходи.
- Неликвидноста на компанијата е видлива. Со позајмиците се генерира голем долг па фирмата покажува несолвентност. Исполнети се условите за отворање стечајна постапка, а должникот има доволно средства да ги покрие трошоците на стечајната постапка, нагласи Петров.
Против оваа мерка беше правниот застапник на А1 Донче Наков, кој рече дека телевизијата и натаму мора да работи.