Скопје, 27 јули 2011 (МИА) - Триесетина коњаници од Горно Лисиче, денеска од дворот на општина Аеродром го почнаа традиционалниот Илинденски марш во пресрет на одбележувањето 108 години од Илинденското востание.
Учесниците, кои на 2 август треба да пристигнат во Крушево се на возраст од 17 до 57 години, а меѓу нив годинава е и една жена. Придружувани од фаланга составена од дваесетина членови, зурли и тапани и играорци од КУД „Никола Јонков Вапцаров“ се упатија кон црквата „Свети Петар и Павле“ во Горно Лисиче, каде се одржа свечена литургија на која високи свештеници од Македонската православна црква им дадоа благослов на патот кон Крушево.
Градоначалникот на општина Аеродром, Ивица Коневски на коњаниците им посака многу енергија, издржливост и среќен пат до Крушево.
- Илинденскиот марш од Горно Лисиче стана еден од најважните културни настани во општина Аеродром, а без сомнение, се вброи и меѓу најзначајните манифестации во одбележувањето на најголемиот национален празник во Македонија – Илинден, рече Коневски.
Маршот се одржува 33-ти пат во организација на здружението „Илинденски марш 1978“ и е под покровителство на општина Аеродром.