Скопје, 18 август 2011 (МИА) - Со централна свеченост во Центарот за обука на вода во Охрид денеска ќе биде прославен Денот на Армијата на Република Македонија, на која ќе се обрати претседателот на Македонија и врховен командант на вооружените сили Ѓорге Иванов.
На централното одбележување ќе биде и примопредадена должноста началник на Генералштабот на АРМ од Мирослав Стојановски на Горанчо Котески, досегашен командант на Здружената оперативна команда и активен генерал кој ги исполнува стандардите на НАТО, кој ќе биде деветти началник на ГШ.
Во чест на Денот на АРМ ќе се обрати и министерот за одбрана Фатмир Бесими, ќе биде оддадена почит на загинатите борци и припадници на АРМ, ќе бидат доделени одликувања од претседателот на државата и ќе се изврши прелет со два борбени хеликоптера Ми-24 од составот на воздухопловниот ВИНГ на АРМ.
18 Август е прогласен за Ден на АРМ со одлука на Владата на Република Македонија од 3 јуни 1993 година и првпат е одбележан таа година.