Струга, 25 август 2011 (МИА) - Струшки вечери на поезијата (СВП) е најстар поетски фестивал на Балканот и најстар со непрекинат континуитет во светот. Во чест на струшките преродбеници од втората половина на 19 век Константин и Димитар Миладинови и на нивното капитално дело – Зборникот на народни умотворби (Загреб, 1861), група македонски поети во 1962 година организирале поетско читање, кое е зачеток на Струшките вечери на поезијата.
Наредната, 1963 година, ним им се придружиле поети од републиките на поранешна Југославија. Тогаш е востановена наградата „Браќа Миладиновци“ за најдобра поетска книга од македонски автор објавена меѓу две фестивалски изданија. Прв добитник е токму Матеја Матевски, годинашниот носител на „Златниот венец“ на СВП, за стихозбирката „Рамноденица“. Наградата „Браќа Миладиновци“ тој ја добил и во 1981 година за поетската книга „Липа“.
По неколку години СВП прераснал во интернационален настан, на кој учествуваат истакнати странски поети. Во 1966, на петтите СВП, е востановена меѓународната награда „Златен венец“, која му се доделува на светски познат жив поет за неговиот опус или животно дело од областа на поезијата. Признанието се состои од филигрански изработен златен лавров венец. Прв добитник е рускиот поет Роберт Рождественски.
Академик Матевски е 46-тиот добитник на „Златен венец“ и втор поет од Македонија одликуван со оваа награда, по Блаже Конески (1981). Меѓу лауреатите се и четворица добитници на Нобеловата награда за литература – Пабло Неруда од Чиле, Јосиф Бродски од САД, Еуџениот Монтале од Италија и Шејмас Хини од Ирска. Во долгиот список на добитници на „Златен венец“ се само две жени – Десанка Максимовиќ од Србија (тогаш СФРЈ) во 1988 и Нанси Морехон од Куба во 2006 година.
Во соработка со УНЕСКО, од 2003 година се доделува наградата „Мостови на Струга“ за најдобра дебитантска поетска книга од млад автор од светот. Добитник годинава е Хироши Танучи од Јапонија.
Секоја година фестивалот се отвора со антологиската „Т’га за југ“ во која Константин Миладинов во стихови го преточил својот копнеж по топлиот југ, родната Струга и езерото додека бил на студии во Москва. Во петте децении фестивалот ги збогатувал своите програмски содржини и привлекува голем број учесници од разни страни на светот.