Скопје, 6 септември 2011 (МИА) - Судот донесе решение да се запре кривичната постапка за обвинетите во „Мавровски работници“, еден од хашките случаи. Одлуката е донесена по барање на обвинителството, повикувајќи се на автентичното толкување на членот 1 од Законот за амнестија.
Според усвоеното толкување, членот 1 од Законот за амнестија треба да се толкува така што амнестијата се применува на сите сторители на кривични дела поврзани со конфликтот од 2001 година заклучно со 26 септември 2001 година, освен за лицата кои извршиле кривични дела поврзани и во врска со конфликтот, а против кои Меѓународниот трибунал повел постапка.
Тоа значи дека се запираат кривичните постапки и потполно се ослободуваат од казна затвор лицата за кои постои сомневање дека подготвиле или сториле кривични дела поврзани со конфликтот во 2001 година.
До Уставниот суд се поднесени претставки по изгласувањето на автентичното толкување на Законот за амнестија, но досега судот не се изјаснил по нив.
Од петте хашки случаи, судот во Хаг го процесуираше само случајот Љуботен, а останатите четири, „Мавровски работници“, „Липковска брана“, „Непроштено“ и „Водство на ОНА“, Хашкиот трибунал ги врати во надлежност на македонските судови.