Прилеп, 12 септември 2011 (МИА) - Пожарите во прилепско-долненскиот регион се се уште активни, но нема опасност за манастирите Трескавец и Свето Преображение кај Зрзе, изјави вечерва за МИА Станко Колески, командир на прилепската противпожарна единица.
- Состојбата е посмирена, нема опасност за манастирите, но сепак, пожарите се се уште активни. Сите екипи остануваат на теренот. Десетина пожарникари се кај Трескавец, а пет кај селото Зрзе, објаснува Колески.
Доброволци од јавните прилепски претпријатија се очекуваат рано изутрина, а треба на помош да стигнат и хеликоптери од Дирекцијата за заштита и спасување.
Со неколкуте пожари екипите на прилепската противпожарна единица и од јавното шумско претпријатие „Црн Бор“ се борат повеќе од 24 часа. Екипите остануваат на терен да ги контролираат стихиите.
Најголемата опасност за манастирските комплекси траеше речиси цел ден. Во вечерните часови прво пожарот беше пренасочен и оддалечен од манастирот Трескавец, а сега е безбедно подалеку огнената стихија и од Свето Преображение кај Зрзе.