Скопје, 14 септември 2011 (МИА) - На предлог на Комисијата при Министерството за здравство за превенирање на последиците од топлотни бранови, а со цел заштита на населението, посебно на ризичните групи, Владата на Република Македонија им препорачува на образовните установи, денеска и утре да преземат активности за овозможување скратена настава за учениците до 12:00 часот.
На воспитно-образовните установи (градинки) им се препорачува да не практикуваат физичка активност и да не ги изнесуваат децата на отворено во периодот од 11 до 16 часот.
На работодавците им се препорачува во следните два дена да ги ослободат од работни обврски бремените жени и лицата над 60-годишна возраст, како и избегнување работа на отворено во периодот од 11 до 16 часот.
На населението му се препорачува да се почитуваат општите мерките за превенција од топлотни бранови и заштита на здравјето, како што се избегнување директна изложеност на сонце, консумација на лесна храна и течности, носење светла и лесна облека, како и редовно земање на предложената терапија од лекар.
Комисијата при Министерството за здравство за превенирање на последиците од топлотни бранови овие препораки ги донесе на седницата одржана синоќа по повод најавата на метео-алармот од Управата за хидрометеоролошки работи за топлотен бран од втора, односно портокалова фаза, кој ќе ја зафати територијата на цела држава денеска и утре, со температури многу повисоки од вообичаените за овој период, кои во поедини региони ќе достигнат и до 37 степени Целзиусови.