Скопје, 22 септември 2011 (МИА) - Се препознава позитивна атмосфера во однос на претстојниот попис на населението, домаќинствата и становите. Граѓаните може да препознаат какво е значењето на пописот. Не очекуваме никакви проблеми. Преку медиумската кампања, која е веќе отпочната, нашата главна порака е дека ова е попис за секој поединечно и за сите заедно, затоа што треба да биде основа за сите наредни политики и стратегии, изјави денеска за МИА директорката на Државниот завод за статистика Благица Новковска.
Позитивен став дека пописот ќе мине без проблеми и оти граѓаните ќе се попишат без исклучоци денеска изнесе и претседателката на Државната пописна комисија Весна Јаневска.
- Се надевам дека се ќе биде како што треба. Реално мислам дека пописот ќе мине добро, рече таа во изјава за МИА.
Подготовките за пописот што во Македонија ќе се одржи од 1 до 15 октомври, според Новковска и Јаневска, се одвиваат согласно планираното.
- Во овој момент најважен дел од тие подготовки е обуката на учесниците кои ќе бидат на терен и се задолжени да го спроведуваат процесот на попишување. Завршени се обуките на државните инструктори кои се на врвот од хиерархијата на лицата задолжени на терен да ги спроведуваат методологиите. Сега се во тек обуките на реонските инструктори кои се избрани од државната администрација, па понатаму ќе продолжи обуката и за оние што се избрани на конкурс и очекуваме следната недела да отпочне процесот на обука на попишувачите, вели директорката на Државниот завод за статистика.
Согласно планираната динамика на 30 септември сите обучени учесници во пописот ќе треба да ги посетат реоните за кои ќе бидат задолжени согласно стандардите. - Попишувањето треба да започне на 1 октомври во 8 часот, изјави Новковска.
Во сабота, како што информираше Јаневска, пак, ќе се знае точниот број на попишувачи по етнички заедници, а нивниот вкупен број треба да изнесува околу 16.500. Во целокупниот процес на попишување ќе бидат вклучени околу 20.000 учесници.
Јаневска потсетува дека граѓаните при попишувањето треба да имаат оригинални документи, како лична карта, пасош, извод од матична книга, здравствена легитимација, потврда доколку примаат социјална помош, поседовен лист... и по можност тие да не се постари од една година. Исто така посочува дека ќе се попишуваат и полнолетните лица кои немаат лична карта и пасош, но тие мора да имаат оригинален извод и уште еден документ за идентификација како здравствена легитимација, или чек од примена социјална помош, или потврда дека се вработени, или ако е студент потврда дека учи или студира...
Согласно Законот, првите резултати од пописот треба да се објават во декември и тоа за вкупно попишаните домаќинства, лица и станови на ниво на општини.
- Истовремено ќе отпочне процесот на внес обработка и анализа на целокупниот пописен материјал кој е навистина обемен имајќи предвид дека нашите пописни обрасци се многу пообемни и посложени од другите земји, вели директорката на Државниот завод за статистика.
Пописот во Македонија ќе се одржи од 1 до 15 октомври.