Скопје, 7 ноември 2011 (МИА) - Министерот за надворешни работи Никола Попоски денеска се сретна со државниот секретар во австриското сојузно министерство за европски и меѓународни работи, Волфганг Валднер.
На средбата, како што информира македонското МНР, беше разговарано за билатералните односи и можностите за нивно натамошно унапредување, како и за поддршката од страна на Австрија на патот кон целосната интеграција на Република Македонија во евроатлантските структури.
- Во однос на обновената препорака од Европската комисија до земјите-членки за почеток на преговорите со Република Македонија, министерот Попоски го пренесе очекувањето за активна поддршка од Австрија за конечно процесуирање на препораката на Комисијата од страна на Советот на ЕУ, на декемврискиот состанок, оваа година, соопшти МНР.
На средбата беше нагласено и задоволството од меѓусебната соработка во доменот на економијата, посебно на полето на инвестициите и условите кои Република Македонија ги нуди за странските инвеститори, а беа покренати и прашања од областа на мултилатералната соработка меѓу двете земји.