Скопје, 11 ноември 2011 (МИА) - Ал Џазира Балканс денеска во 18:00 часот започнува со емитување на својата програма. Програмата ќе се емитува од централното студио во Сараево, како и од регионалните центри во Белград, Загреб и Скопје.
Гледачите во регионот ќе можат да ја следат програмата на оваа глобална информативна мрежа преку кабловските и ИП ТВ оператори, преку сателитот на ЕутелСат, како и преку земјен сигнал во Босна и Херцеговина.
Програмата на Ал Џазира Балканс ќе биде првата програма која оваа глобална ја прикажува на друг јазик освен на англиски или арапски.
Користејќи ја регионалната мрежа на дописници, како и глобалните дописништва на Ал Џазира, Ал Џазира Балканс на гледачите во регионот ќе им носи како регионални, така и глобални вести, а од овој регион ќе известуваат за гледачите во светот кои ги следат програмите на англиската и арапската програма на Ал Џазира.
Шесте часа вести кои локално се продуцираат, интервјуата, коментарите и анализите, како и квалитетната документарна програма која ќе ја емитува Ал Џазира Балканс претставуваат почеток на едно ново поглавје во медиумското известување во регионот.
Ал Џазира Балканс ќе работи под слоганот „Од секој агол и за секоја страна“ и ветува независно и непристрасно известување.