Скопје, 24 ноември 2011 (МИА) - ВМРО-ДПМНЕ и СДСМ денеска остро го осудија палењето на македонското знаме на фудбалски натпревар на Косово, каде исто така имало и транспаренти за делба на Македонија.
- Остро го осудуваме таквиот гест, кој не оди во насока на подобрување и европеизација на односите на Балканот. Во овој случај многу побитно е како ќе изреагираат косовските власти, изјави Илија Димовски, директор на Центарот за комуникации на владејачката ВМРО-ДПМНЕ.
Јани Макрадули од СДСМ го пренесе ставот на најголемата опозициска партија во земјата посочувајќи дека палењето на македонското знаме на фудбалски натпревар не оди во прилог на развивање на добрососедските односи на Македонија со Косово и претставува ризик за будење на стариот балкански радикализам, кој одамна требаше да остане минато.
- Очекуваме косовските власти да реагираат брзо и веднаш јавно да ги осудат провокациите и да го санкционираат радикализамот на фудбалските навивачи, изјави Макрадули. Неопходна, според него, е реакција на македонската дипломатија и јавна осуда од албанските политички партии во Република Македонија.