Скопје, 22 декември 2011 (МИА) - Убедена сум дека Собранието сериозно ќе ја разгледа Информацијата која денеска беше изгласана од страна на Тито Петковски, Тања Томиќ и Орхан Ибраими и ќе донесе соодветна одлука, стои во писмената изјава од министерката за внатрешни работи Гордана Јанкулоска по денешната седница на собраниската Комисија за надзор над спроведување на мерките за следење на комуникациите од страна на Министерството за внатрешни работи и од Министерството за одбрана.
- Доколку Собранието, како и Судот, одлучи дека посебните истражни мерки се применети согласно законот, а сите докази во рамки на операцијата „Кампања“ се валидни, очекувам Петковски да се извини за сите клевети и навреди кон полициските службеници дека тие незаконски го прислушувале осудениот и други лица кои биле во контакт со него, истакнува Јанкулоска.
Очекувам, вели министерката Јанкулоска, Петковски да си поднесе оставка поради злоупотребата на функцијата пратеник и претседател на собраниска комисија заради лична промоција, доколку се утврди дека постапувал надвор од ингеренциите.
МВР, потсетува во писмената изјава Јанкулоска, досега во безброј наврати му одговори на Петковски и останува на ставот дека во случајот кампања не е употребено прислушувањето како посебна истражна мерка.