Александар, братот на покојниот Мартин Нешкоски, кој почина по претепувањето на скопскиот плоштад „Македонија“ на 6 јуни минатата година, за порталот Плусинфо со став дека очекува доживотна затворска казна за специјалецот Игор Спасов.
- Полицајците наместо да собираат докази, крајно некоректно се однесувале, па дури и ги заташкале, ги уништиле доказите. Поднесовме пријава против двајцата униформирани полицајци кои први пристигнале на местото каде бил повреден Мартин, но и против непознато лице, а обвинителство ја одби кривичната пријава, изјавил Александар Нешкоски по одлуката на Јавното обвинителство со која специјалецот Игор Спасов останува единствениот осомничен за убиството на дваесет и двегодишниот Мартин.
Тој прашан за тоа каква пресуда може да се очекува за специјалецот Спасов в понеделник, истакна дека очекуваат преквалификација на делото и доживотна затворска за Игор Спасов. Како и досега, семејството Нешкоски и денеска јавно не ја соопшти сумата која ќе ја побара како оштета за загубениот живот на Мартин, па во тој контекст Александар тврди дека е беспредметно и неблагодарно да се побара било каква сума.
- Сите што досега ме прашаа колкава ќе биде оштетата им реков дали можат да си го проценат својот син или брат, колкава оштета да побараат за неговиот прерано згаснат живот? Беспредметно и неблагодарно е да се зборува сега за тоа, единствено што сега сакаме е правдата да биде задоволена и виновниците за смртта на Мартин да си ја добијат заслужената казна, рече Нешкоски.
Обвинителството вчера одлучи дека нема други вмешани лица во убиството на Мартин Нешкоски и кривичната пријава против непознати лица што ја поднесе семејството на Мартин беше одбиена. Таквата одлука била донесена бидејќи немало доволно докази за да се покрене кривична пријава против други лица кои што биле вмешани во убиството на момчето.