Њујорк, 17 јануари 2012 (МИА) - Посредникот на ОН во процесот за решавање на спорот за името меѓу Македонија и Грција Метју Нимиц разговорите на одвоените средби со претставниците на двете земји Зоран Јолевски и Адамантиос Василакис кои вчера и денеска се одржаа во Њујорк ги оцени како конструктивни и најави наскоро посета на Скопје и Атина.
- На мое барање се сретнав со секој од претставниците посебно во повеќе наврати. Двете страни ги презентираа моменталните позиции за прашањето за името на своите влади. Нашите дискусии беа корисни и фокусирани на изнаоѓање оптимална можност за придвижување на процесот напред на конструктивен начин. Ми беа дадени цврсти уверувања дека секоја Влада е искрена во нејзиниот интерес за изнаоѓање решение и дека тие целосно го почитуваат процесот во рамки на Обединети нации, се вели во писмената изјава од Нимиц дистрибуирана од прес службата на ОН.
- Имајќи ги предвид овие залагања ќе се консултирам во иднина со двајцата претставници во врска со подготовка на посета на главните градови на двете земји за продолжување на дискусиите. Како што се придвижуваме напред, побарав од страните да ја покажат нивната посветеност за надминување на разликите со промовирање позитивна атмосфера преку нивните активности и јавни изјави, се вели во соопштението.