Знам дека сум осуден уште пред да ми пресудат, рече денеска во завршното обраќање пред судот Велија Рамковски, првообвинет во случајот “Пајажина“.
Поранешниот сопственик на А1 Телевизија во завршните зборови рече дека целиот случај против него и останатите обвинети во “Пајажина“ е политички процес.
“Владата на чело со Груевски реши да бидат затворени критички настроените медиуми А1 и А2 телевизија, весниците ’Време’, ’Шпиц’ и ’Коха е Ре’. За да го оствари тоа, требаше да прогласат криминал и криминалци и тоа го направија. Нас не стави во затвор, а медиумите ги затвори. Знам дека сум осуден уште пред да почне судењето“, рече Рамковски денеска во Основниот суд 1 во Скопје.
Рамковски и уште 22 лице се обвинети за затајување данок, перење пари, злосторничко здружување и злоупотреба на службената положба и овластување.