Скопје, 21 февруари 2012 (МИА) – Министерот за одбрана Фатмир Бесими денеска ќе престојува во еднодневна официјална посета на Косово. Посетата на Приштина, првично планирана за 13 февруари, беше одложена поради лошите временски услови.
Бесими ќе се сретне со министерот на Косовските безбедносни сили (КБС) Агим Чеку, со командантот на КБС генерал потполковник Кадри Кастрати и со вицепремиерот на Косово Хајредин Кучи.
Преку оваа посета се очекува да се потврди заложбата на двете министерства да продолжат и понатаму да соработуваат, како на билатерално ниво, така и во рамки на регионалните иницијативи.
За време на посетата е предвидено потпишување План за билатерална соработка за 2012 година, со кој се утврдени можностите за користење на македонските расположливи капацитети: Полигонот Криволак, Регионалниот тренинг центар за комуникации и Воено медицинскиот центар, како и школување на питомци од Косово на Воената Академија во Скопје.
Од приоритетно значење на Министерството за одбрана на Република Македонија е постигнување целосно отворен дијалог и добрососедски односи со Република Косово, како и постигнување високо ниво на соработка во областа на одбраната и безбедноста на двете земји.
Министерот Бесими, како што соопшти Министерството за одбрана, ќе истакне дека развојот и одржувањето на регионалните капацитети треба да се базира на концептот на „смарт дефенсе“ (паметна одбрана), со цел здружување и споделување на одбранбените и безбедносни средства.
Македонскиот министер за одбрана ќе го посети и Центарот за универзитетски студии на Косовските безбедносни сили во Командата на копнената војска.