Мелбурн, 27 февруари (МИА) - Претседателот на Собранието на Република Македонија Трајко Вељаноски денеска ја почнува официјалната посета на Австралија со средба со спикерот на Парламентот на Викторија Кен Смит и со претседателот на Горниот дом Брус Аткинсон.
Се очекува на средбата да стане збор за продлабочување на односите на парламентарно ниво меѓу двете земји.
Според агендата, Вељаноски ќе има средба и со градоначалникот на Витсли, Стеван Козневски. Предвидено е претседателот на македонското Собрание да се сретне со претставници на Советот на македонската заедница од Викторија, како и со членови на Австралиско-македонскиот комитет за човекови права кои успешно ја завршија кампањата за лобирање кај австралиската Влада да го повлече терминот „славомакедонски“ од официјална употреба и да го користи „македонски“.
Во рамки на посетата, Вељаноски утре во Мелбурн ќе има работен ручек што во негова чест го приредува пратеникот Ендру Елсбери, иницијатор за формирање Група за соработка со Република Македонија, а ќе ја посети и Националната галерија на Викторија.
Во состав на собраниската делегација се и пратениците Илија Димовски, Милорад Додевски, Цветанка Иванова и Џевад Адеми.