Брисел, 1 март 2012 (МИА) - Председателот на Владата Никола Груевски попладнево на маргините на Самитот на европските народни партии и на Самитот на Европската унија во Брисел имаше средба со неговиот грчки колега Лукас Пападимос.
Средбата е во функција на унапредување на дијалогот и развојот на добрососедските односи. Соговорниците разговараа за курсот на билатералните односи и разни аспекти на соработка меѓу двете земји. Во однос на прашањето за името, двете страни истакнаа посветеност за продолжување на разговорите во рамките на процесот на Обединетите нации во насока на изнаоѓање заемно прифатливо решение, информираа од владината делегација.
Средбата се одржа во Европскиот совет и е прва на премиерот Груевски со премиерот на преодната грчка влада Пападимос. Со неговиот претходник, Јоргос Папандреу, шефот на македонската влада последен пат се сретна во јуни минатата година. Досега се остварени десет средби на високо ниво меѓу Скопје и Атина.
Денешната средба беше на иницијатива на Груевски, а локацијата ја избра Пападимос, бидејќи и двајцата се дојдени во Брисел на работни средби.
Официјална Атина подолго време се обидуваше да ја избегне средбата на високото ниво, со образложение дека има техничка Влада, која нема мандат за решавање на спорот за името.
На веб-страницата на Владата на Грција денеска беше наведено дека двајцата лидери изразиле политичка волја за продолжување на дијалогот за решавање на спорот.
Во текот на денов премиерот Груевски имаше билатерални средби со премиерите на Унгарија - Виктор Орбан, Словенија - Јанез Јанша, Шведска - Фредрик Реинфелт, Албанија - Сали Бериша и Летонија - Владис Домбровскис, како и со лидерите на десничарските партии на Хрватска и Украина. Теми на разговорите биле европските интеграции и односите меѓу земјите.