Лондон, 26 март 2012 (МИА) - Министерот за надворешни работи на Република Македонија, Никола Попоски денеска во престолнината на Велика Британија ќе се сретне со својот колега, државниот секретар за надворешни работи Вилијам Хејг.
На средбата во Лондон, ќе бидат разменети мислења околу развојот на билатералните односи и соработка меѓу двете земји, како и за соработката на меѓународен план.
Се очекува Попоски да ги претстави македонските позиции по пресудата на Меѓународниот суд на правдата во Хаг и евроатланските интеграциски процеси, јави известувачот на МИА.
Во рамки на работната посета шефот на дипломатијата денеска во Британскиот парламент ќе има средба со претседавачот на Пратеничката група за соработка со Македонија Карен Лумли, како и со претставници на комисиите во Горниот и Долниот дом за надворешни работи и за Европска Унија.
Вечер Попоски ќе се сретне со бројни претставници на македонската дијаспора во Велика Британија.
Министерот за надворешни работи Попоски за време на посетата утре ќе одржи предавање во Европскиот совет за надворешни односи.