Скопје, 20 април 2012 (МИА) - МВР и понатаму интензивно работи на расчистување на петкратното убиство што се случи кај село Смиљковци и во континуитет излегуваат нови докази, од јавувања на граѓани, снимки од камери,... кои мораат сериозно да се анализираат.
За некои од анализите, посочуваат од МВР, се потребни најмалку 48 часа.
Според прелиминарните видувања, брифираат од полицијата, се работи за најмалку три лица извршители на убиството, сепак, се уште сите сценарија се во опција, ниту едно не е исклучено.
По извршената реконструкција, е утврдено дека грозоморното убиство е извршено многу брзо од пет до десет минути, нешто пред 20 часот, а во полицијата е пријавено по два часа односно во 22.15 часот.
Од МВР посочуват дека се знае целата историја на возилото „опел омега“ пронајдено во близина на местото на настанот, како и за „мерцедесот“ од кој биле украдени регистарските таблици кои биле ставени на „опелот“. Во „опелот“ се пронајдени траги кои се анализираат.
Во врска со помошта која е понудена од странските разузнавачки служби, пред се од соседството, засега се се сведува само на декларативна, а изостанува конкретна помош.
За протестот што се случи и нередите предизвикани пред зградата на Владата, а во врска со петкратното убиство, МВР има поднесено 14 кривични пријави за учество во толпа.