Милован Стефановски и Санде Стојчевски добитници на наградите на списанието „Бранувања“

Скопје, 3 мај 2012 (МИА) - Наградата „Крсте Чачански” која здружението „Бран“ и списанието „Бранувања“ од Струга ја доделуваат за необјавена  книга раскази за 2012 ја доби писателот Милован Стефановски за „Ѓаволско море”. Наградата „Јован Котески“, пак, за необјавена поетска книга, оваа година ја доби Санде Стојчевски за стихозбирката „Јаз во јазикот“.

Добитникот на наградата „Крсте Чачански“ го избра жири, во состав: Христо Петрески (претседател), Милутин Бебековски и Тоде Илиевски, а за добитникот на „Јован Котески“ реши жирито составено од Трајче Кацаров (претседател), Ристо Ѓ. Јачев и Мерсиха Исмајлоска (членови).

Книгата раскази „Ѓаволско море“ од Милован Стефановски содржи  20 раскази. - Таа претставува привлечна, складна и функционална прозна целина, која се одликува со својата оригиналност на авторскиот јазик и писмо, со селективниот одбир на темите, минуциозниот и продлабочен стил. Авторот се определува за изворниот народен говор, кој станува и негов личен автентичен исказ, создавајќи дело во манирот на магискиот реализам и современиот прозен дискурс, образложува жирито што одлучи за наградата „Крсте Чачански“.

За делото на Стојчевски се наведува дека има специфична лексика и дијалектни зборови. - Тие ја  надополнуваат идејата за креирањето на ова оригинално поетско четиво... Поетскиот дијалог со Блок, Пастернак, Црњански, Нагољева и, секако, Конески преку Котески, го доближува лирскиот до прозниот дискурс со што се создава една мистификација на поетската збирка која уште еднаш, преку својот специфичен сензибилитет, го потврдува поетскиот гениј на Санде Стојчевски, ја образложи својата одлука жири-комисијата.