Претседателот на Република Македонија Ѓорге Иванов престојува во Чикаго каде на покана на НАТО Алијансата ќе учествува на Самитот на Северно-атлантскиот совет, на ниво на шефови на држави и влади, кој ќе се одржи на 20 и 21 мај.
Во делегацијата на Република Македонија на Самитот се и министрите за одбрана и за надворешни работи Фатмир Бесими и Никола Попоски, амбасадорот во мисијата при НАТО Мартин Треневски и амбасадорот во Соединетите Американски Држави Зоран Јолевски.
Претседателот Иванов ќе има свое обраќање на овој состанок. Истиот ден предвидена е и одделна средба на министерско ниво на Македонија, Црна Гора, Босна и Херцеговина и Грузија со земјите членки на НАТО.
Предвидено е членовите на македонската делегација да имаат голем број средби со претставници на државите - членки на НАТО.
На Самитот му претходеше интензивна активност на македонската дипломатија. Македонскиот државен врв оствари голем број средби со претставници на САД, Германија, Британија, Турција, Словенија, Унгарија, Италија и други држави - членки на НАТО, за да се промовира значењето на македонскиот прием во НАТО.
Според генералниот секретар на НАТО Андерс Фог Расмусен, Самитот во Чикаго нема да биде посветен на проширувањето на Алијансата. Во фокусот главно ќе бидат три теми: посветеноста на Алијансата кон мисијата во Авганистан, развивање на концептот на „паметната одбрана“ за соочување со предизвиците на 21 век, и зацврстување на партнерскатата мрежа на НАТО низ светот.