Будимпешта, 22 мај 2012 (МИА) - Унгарскиот премиер Виктор Орбан на самитот во Чикаго побара прием на Македонија и на Црна Гора во НАТО во најкус можен рок, пишува во соопштение на унгарската Влада.
- Проширувањето на НАТО досега се покажа како успешна приказна и интеграцијата мора да продолжи. Унгарската Влада во целост го поддржува приемот на Македонија и на Црна Гора во најкус можен рок, пишува во соопштението на унгарската Влада посветено на самитот на НАТО во Чикаго.
Во текстот на соопштението се истакнува дека ова бил ставот на премиерот Орбан изнесен на самитот на НАТО. Унгарскиот премиер ја поддржува Македонија и за отворање на преговорите со Европската Унија и нивно водење паралелно со разговорите со Република Грција за спорот за името.
Минатиот јули Орбан испрати писмо до Советот на Европската Унија и до високиот претставник на ЕУ Кетрин Ештон со кој побара отворање на пристапните преговори со Унијата.