Брисел, 28 јуни 2012 (МИА) - Европската комисија дури денеска реагираше на срамното омаловажување на македонските туристи од страна на грчките гранични власти со лепење на налепници со назнаката „БЈРМ“ над официјално признатиот код „МК“, што се наоѓа на регистерските таблички.
Петер Стано, портпаролот на еврокомесарот за проширување Штефан Филе, го пренесе ставот на Комисијата во врска со ова недолично однесување на земјата-членка на Европската унија, употребувајќи ја стандардната реторика на поделена одговорност, иако во случајов има класично кршење на човековите права, јави дописникот на МИА од Брисел.
- Ние сме свесни за тоа билатерално прашање кое неодамна се појави. ЕК ги повикува двете страни да го решават ова прашањето во духот на добрососедските односи. Во корист на двете земји е да се обезбеди слободно движење на возила и двете држави ќе имаат корист од решавање на сите потешкотии, изјави гласноговорникот на еврокомесарот за проширување на ЕУ.