Скопје, 16 јули 2012 (МИА) – Се забележуват конкретни и бројни резултати и подобрувања во делот на спроведување на Охридскиот рамковен договор, судството и слободата на изразување на медиумите.
Ова го соопшти Стефано Санино, генерален директор на Генералниот директорат за проширување на Европската комисија по денешната средба во македонската Влада со вицепремиерот задолжен за европски прашања Теута Арифи на која се разговараше за напредокот на земјата по воспоставувањето на Претпристапниот дијалог на високо ниво меѓу Република Македонија и Европската унија.
Санино нагласи дека имале многу конструктивен состанок на кој се разговарало за напредокот на Република Македонија и за прогресот на институциите во земјата.
- Можам да кажам дека заедничката агенда добро напредува и оти не очекува напорна работа во следните месеци, но очекувам конкретни резултати, изјави Санино по средбата, истакнувајќи дека ЕУ ќе направи се што е во нејзина моќ да ги релаксира сите пречки за процесот да продолжи и понатаму.
Тој ја најави следната средба на двете страни која, како што рече, треба да се одржи на 24 јули во Брисел.
Досега сработеното, истакна вицепремиерот Арифи, зборува за фактот дека Македонија адресирала повеќе прашања, како прашањето на дијалогот со претставниците на медиумите, извештајот за реализација на Охридскиот рамковен договор, работата на Управувачкиот комитет за изборите и други прашања.
- Разговаравме за прашања поврзани со дијалогот на високо ниво, напредокот постигнат досега и за Извештајот кој го поднесовме на крајот на јуни, а ни беше обврска за реализација, додека денеска привршуваме со средно оценување на процесот на дијалог на високо ниво, рече Арифи.
Процесот на дијалог на високо ниво, оцени, е многу важен за Република Македонија. Вицепремиерот соопшти дека идниот состанок за дијалогот е закажан за 17 септември.
- Очекуваме овој процес дефинитивно да се заклучи со реализација на преземените обврски, додаде Арифи.