Четириесет и шестгодишниот вработен во „Македонски шуми“, со тешки изгореници од пожарот кај Струмица, почина попладнево на Клиниката за хирушки болести „Св. Наум Охридски“ во Скопје, информираа од Клиниката.
Тој е брат на претходно починатиот 50-годишен пациент, исто така, вработен во „Македонски шуми“.
Уште еден од повредените во пожарот се бори за живот и е во исклучително тешка општа состојба. На Клиниката синоќа беа хоспитализирани петмина повредени.
Повреденото дете со 40 отсто изгорена површина од втор и трет степен се наоѓа во стабилна општа состојба, не е витално загрозено и кон крајот на денот или изутрина ќе биде префрлено на Одделот за пластична и реконструктивна хирургија.
Во Струмичката болница се хоспитализирани 10 пациенти со изгореници од кои седум деца и тројца возрасни. Тие се со стабилни витални параметри и се вон животна опасност.
Пожарот избувна вчера напладне во местото Чамчифлик, зафати борова шума и смрека на околу 100 хектари, по што се прошири кон градот, но беше изгаснат од дождот во 19 часот и 30 минути.
Според првичните сознанија на Центарот за управување со кризи, причина за пожарот кај Струмица е човечки фактор.