Скопје, 26 септември 2012 (МИА) - Со топлотен бран од жолта, односно алертна фаза, утре ќе биде зафатен дел од територијата на држава, вклучително и градовите Скопје, Куманово, Велес, Битола, Прилеп, Штип, Струмица, Кавадарци, Неготино, Радовиш, Валандово, Демир Капија и Дојран, соопшти Министерството за здравство согласно најавата на метео-алармот од Управата за хидрометеоролошки работи.
Деновите со повисоки температури се очекува да траат до крајот на неделата.
Поради високите температури и зголемената можност за активност на комарци, Министерството потсетува да се почитуваат општите препораки за заштита од топлотен бран, како и посебно внимание да се посвети на препораките за заштита од комарци, меѓу кои се: употреба на мрежи против комарци за заштита на бебињата, старите лица и сите други кои би можеле да се одмораат во текот на денот (ефикасноста на таквите мрежи може да се подобри доколку се третираат со инсектициди), и во доцните вечерни часови, по заоѓање на сонцето и раните утрински часови, пред изгревање на сонцето, кога се активни комарците се препорачува употреба на спирали/ленти против комарци, репеленти и во текот на дневните часови - електрични вапоризатори (спреј), стои во соопштението од Министерството.