Скопје, 5 октомври 2012 (МИА) Владејачкото мнозинство и опозицијата на координацијата на пратеничките групи кај претседателот на Собранието Трајко Вељаноски се договорија за текот и редоследот на говорници на денешната 43. седница на која треба да расправа и да се гласа за доверба на Владата, по барање на опзициската СДСМ.
На координацијата на пратеничките групи кај претседателот на Собранието Трајко Вељаноски е договорено на почетокот на седницата координаторот на пратениците на СДСМ Игор Ивановски да има 30-минутно образложени на барањето за гласање доверба на Владата. На неговото образложение не се предвидени реплики.
Потоа ќе дискутираат пратениците, наизменично еден од опозицијата, па еден од владејачкото мнозинство. Пратеникот во текот на претресот може да говори повеќе пати во траење од вкупно 15 минути. На секое излагање на пратениците се дозволени по 12 реплики, а право на реплика ќе имаат и министрите.
На крајот од расправата, предвидено за 23:20 часот, пред пратениците ќе се обрати премиерот Никола Груевски, по што ќе се гласа за доверба на Владата.
Барањето за гласање доверба на Владата го поднесе опозицијата поради, како што образложија, „двомесечната фингирана конфронтација меѓу владините партнери ВМРО-ДПМНЕ и ДУИ, со која се загрозуваат меѓуетничките односи и интеграциите на земјата“.
Последен пат гласање за доверба на Владата имаше на 7 јуни 2007 година, кога претседател на Парламентот беше Љубиша Георгиевски, а премиер Никола Груевски. Владата тогаш доби доверба од законодавниот дом.