Скопје, 10 октомври 2012 (МИА) - Идентитетот на еден народ спаѓа во оние базични категории за кои не може да се прави компромис со никого, и затоа секогаш ќе реагираме кога некој го загрозува, истакна денеска претседателот Ѓорѓе Иванов, одговарајќи на новинарско прашање за враќањето на придавката „македонски“ во извештајот на ЕК и за неговите најави дека нема да го прими документот ако таа биде повторно изоставена.
Иванов, во изјавата за медиумите на маргините на одбележувањето на 45-годишнината од формирањето на МАНУ, оцени дека вределе сите настојувања и политички битки за „македонски“ да се врати во извештајот.
- Како што се вели меѓу народот, ако не се борите, однапред сте изгубиле. Затоа толку бев упорен токму за ова затоа што во изминатите два извештаја на ЕК тоа беше изоставено. Секогаш сум реагирал и ќе продолжам да реагирам кога се посегнува по кој било дел од нашиот идентитет, затоа што идентитетот спаѓа во оние базични категории за кои не може да правите компромис со никого. И затоа тоа треба да биде пример секојпат кога настојуваме нешто што е наше, а што им припаѓа и на други, а нам ни е ускратено мора вака да се реагира, изјави претседателот Ѓорге Иванов.
Шефот на државата поради изоставувањето на „македонски“ во претходните два извештаја на ЕК, лани и во 2010 година испрати писма до претседателот на Комисијата Жозе Мануел Баросо во кое му укажа дека таквата практика на Брисел ги навредува чувствата на македонскииот народ. Иванов во писмата до Барсо нагласи и дека тоа не помага ниту за изнаоѓање решение за наметнатиот спор за името од страна на Грција. Претседателот Ѓорге Иванов во годишноот обраќање пред пратениците во Собранието на Република Македонија најави и дека нема да го прими новиот извештај на ЕК ако во него не е содржана придавката „македонски“.