Скопје, 5 декември 2012 (МИА) - Триесет и осум годишниот Шукри Алија попладнето е екстрадиран од Косово во Македонија и со највисоки мерки за безбедност спроведен во истражниот затвор Скопје за издржување тригодишна казна затвор врз основа на правосилна пресуда за кривично дело „насилство“.
Министерството за внатрешни работи соопшти дека Алија (38) роден во село Долна Битиња, е екстрадиран во соработка со косовските безбедносни служби.
- ША.(38) беше пријавен поради основано сомнение дека заедно со други следбеници од радикалниот ислам преку насилство и малтретирање на имами се обидуваше да ги заплашува припадниците на ИВЗ. Исто така, како близок соработник со Рамадан Шити, кој го загуби животот во акцијата Планинска бура во с. Бродец, се јавува како лице за кое постојат индиции дека е инволвирано и во голем број други тешки кривични дела извршени на територијата на Република Македонија, се вели во соопштението од МВР.
По масакрот кај Смиљковското езеро, Шукри преку социјалните мрежи повика на масовни протести против операцијата „Монструм“ и порача исламистички групи да ја оневозможат истражната работа на полицијата.