Скопје, 9 јануари 2013 (МИА) - Опозицискиот „Сојуз на иднината“ предводен од СДСМ ќе учествува на изборите доколку покрај најавените локални се одржат и предвремени парламентарни избори. Ова е едно од барањата на опозицијата што денеска на прес-конференција го соопшти претседателот на СДСМ Бранко Црвенковски.
Покрај ова, за фер и демократски избори опозицијата бара и формирање привремена влада чиј мандат ќе биде од распишување до завршување на изборите, смена на клучните ресори - министерствата за правда, внатрешни работи и финансии со личности кои со својот кредибилитет ќе гарантираат објективност на изборниот процес. Се бара и смена на директорот на јавниот сервис МРТВ, како и целосно прочистување на избирачкиот список и измени на Изборниот законик со вградување на препораките на ОБСЕ/ОДИХР.
- Ова се нашите позиции и услови, ова е нашиот предлог за излез од длабоката политичка и институционална криза во која е доведена Република Македонија со политиките и постапките на актуелната власт, рече Црвенковски.
Одлуката, како што истакна тој, е донесена едногласно на вчерашната седница на Централниот одбор во проширен состав на која присуствувале пратениците од СДСМ, актуелните градоначалници и кандидатите за градоначалници.
Од СДСМ истакнуваат дека се подготвени веднаш да отпочнат разговори со партиите на власт за остварување и операционализирање на овие услови, а доколку нивните предлози бидат одбиени тогаш, како што информира Црвенковски, ќе ја продолжат нивната битка со методите на улична демократија и сите видови на граѓански отпор.
- Целокупната одговорност за каков било обид да се организираат какви било нелегитимни избори и со тоа понатамошно политичко дестабилизирање на земјата, ќе ја сноси актуелната власт, рече Црвенковски.