Скопје, 5 декември 2013 (МИА) – Градоначалниците на Виница и на Кочани, Емил Дончев и Ратко Димитровски, синоќа се приведени во Благоевград, Бугарија, затоа што во нивното возило е пронајдена муниција за лов.
На двајцата им е одреден 24 часовен притвор согласно законите на МВР во Бугарија.
Царинските службеници на граничниот премин Станке Лисичково - Делчево во нивното возило марка „цитроен“ пронашле 20 ловечки патрони и една кутија со 100 куршуми калибар 22 милиметри.
Агенцијата „Фокус“, повикувајќи се на информација од бугарското МВР, пишува дека ловечката муниција била откриена во багажникот на возилото.
Двајцата градоначалници се враќале во Македонија од Благоевград каде што заедно со претставници на локалните самоуправи и бизнисмени од двете држави учествуваа на форумот „Бизнис без граници“.