Скопје, 17 март 2014 (МИА) - Полицијата целосно го расчисти случајот во кој биолошкиот татко вчера го оставил бебето кое беше пронајдено оставено на хауба од автомобил на улицата „Никола Вапцаров“ во Скопје.
Мајката на бебето, информираше денеска министерката за внатрешни работи Гордана Јанкулоска, пријавила дека е исчезнато дури по 12 часа.
- Мајката објаснила дека таткото го одзел бебето, врз основа на нивна претходна расправија, изјави Јанкулоска, додавајќи оти ќе бидат поднесени соодветни кривични пријави за повеќе дела против родителите, како што е семејно насилство и запуштање на дете и предизвикување на опасност.
Инаку, во овој случај се работи за дисфункционално семејство, во кое родителите живееле во вонбрачна заедница.
Од Детската клиника, каде што бебето е згрижено, информираа дека на неговото тело се откриени повреди кои предизвикале сомнеж кај лекарите дека можеби се работи за злоставување.
Откако случаен минувач го пријавил случајот со бебето кое било оставено на хауба на автомобил пред Министерството за финансии, тоа било веднаш згрижено и префрлено во болница.