Скопје, 11 април 2014 (МИА) - Во изминатите пет дена регистрирани се 14 нови случаи со морбили, соопшти денеска Центарот за јавно здравје - Скопје.
Според информацијата на Центарот, седум од регистрираните случаи се на возраст од 30 до 43 години, а другата половина се деца до шест години.
Осум лица од заразените биле невакцинирани, пет не подлежат на вакцинација, односно се помали од 13 месеци и едно лице било вакцинирано само со една доза МРП.
На Инфективната клиника, како што е наведено во соопштението, во моментов се хоспитализирани осум лица.
Од прогласувањето на епидемијата на 25 март до вчера во Одделението за епидемиологија при Центар за јавно здравје - Скопје, од Клиниката за инфективни болести и фебрилни состојби Скопје и ГОБ „8 Септември“ биле регистрирани 39 случаи заболени од морбили.
Од почетокот на епидемијата, 6 јануари регистрирани се 64 случаи на мали сипаници, кои се клинички, лабораториски и епидемиолошки поврзани. Четириесет од нив не се вакцинирани, 12 не подлежат на вакцинација, односно се помали од 13 месеци, за четири нема податок и осум лица се вакцинирани со една доза на МРП.
Од потврдените случаи 42 лица се на возраст од 19 до 43 години, 21 е до шест години и едно лице е 15 години.
Во периодот од 31 март до 4 април во Здравствениот дом - Скопје вакцинирани се 197 деца на возраст од 12 месеци до 3 години и 161 дете на возраст од 6 до 13 години.
Со лица заболени од морбили се зафатени 10 општини во државата.