Скопје, 14 април 2014 (МИА) - Од утре попладне до петок Македонија ќе биде под влијание на влажна и постудена воздушна маса. Ќе преовладува претежно облачно време со повремени врнежи од дожд, соопшти денеска Управата за хидрометеоролошки работи.
Во јужните делови од државата утре времето ќе биде нестабилно со пороен дожд и грмежи. Врнежите наместа ќе бидат пообилни, односно над 25 литри на метар квадратен.
Во среда ќе има позначителен пад на температурата, а на планините и на повисоките места ќе има врнежи од снег. Дневната температура во среда ќе се движи од 6 до 13 степени. Ќе дува повремено засилен ветер, претежно од северен правец.
Постепено стабилизирање на времето со пораст на дневната температура се очекува за време на викендот.