„Топол културен бран“ во Крушево

Скопје, 29 јули 2014 (МИА) - Продолжува реализацијата на културните настани во рамките на проектот на Министерството за култура „Топол културен бран“, манифестација која  веќе седум години традиционално се  спроведува во општините низ Република Македонија.

Во градот на културата за 2014 година, Крушево, денеска, во рамките на манифестацијата „Крушево етно-град“, бочварот Миле Талески-Кукин пред посетителите ќе го презентира бочварскиот занает, односно традиционалниот начин на изработка на бочви.

На градскиот плоштад во Крушево, пак, со почеток во 21 часот, концерт ќе одржи етносоставот  „Синтезис”, кој е еден од македонските  најголеми културни амбасадори. Посетителите на Крушево ќе можат да уживаат во она најубавото, исконското, непроценливото македонско фолклорно богатство, во македонската распеана мелодија, македонскиот ритам, исполнет со звукот на традиционалните инструменти, соопшти Министерството за култура.