В сабота „Охридска софра“ во Скребатно

Охрид, 21 август 2014 (МИА) – Традиционални охридски јадења, ѓомлезе, домашно сирење и мед, градинарски култури и други домашни производи, ќе бидат претставени в сабота на втората манифестацијата „Охридска софра“ во село Скребатно.


Ѓоко Апостолов од Секторот за туризам и економски развој денеска на прес-конференција информира дека манифестацијата ќе почне во 10 часот, а целта се промоција на традиционалните јадења од охридскиот регион.

- Централно место ќе има натпреварот во подготвување  ѓомлезе, како еден од највкусните охридски специјалитети. За натпреварот  се пријавени 24 учесници, а наградниот фонд е 20 илјади денари. Подготовката на ѓомлезето ќе почне пред девет часот, а посебна жири-комисија по два и пол часа ќе го дегустира подготвеното ѓомлезе и ќе ги соопшти победниците, рече Апостолов.

Студентите од Факултетот за туризам и угостителство ќе приготвуваат трационални јадења од охридскиот регион, а во забавниот дел концерт ќе одржи групата „Chalgia Sound System“.

- Ваквите промотивни  манифестации посебен интерес предизвикуваат кај странските туристи. Токму затоа, покрај претставниците на угостителско-туристичкиот еснаф и граѓаните во Скребатно очекуваме и поголем број  гости од странство, кои престојуваат во Охрид, истакна Апостолов.

Манифестацијата „Охридска софра“ ја организира Општина Охрид  со поддршка на Министерството за култура.