Скопје, 29 август 2014 (МИА) - Македонскиот претседател Ѓорге Иванов учеството на инаугурацијата на новоизбраниот претседател на Република Турција, Реџеп Таип Ердоган во Анкара го искористи и за неформални средби со негови колеги.
На средбите претседателот Иванов им го честиташе преземањето на новите функции на претседателот на Турција, Реџеп Таип Ердоган и на новиот премиер, Ахмед Давутоглу.
Во разговорите, како што информираат од кабинетот на Иванов, било нагласено взаемното задоволство што двете земји традиционално го негуваат - исклучително пријателски односи, кои се на ниво на стратешко партнерство. Взаемен заклучок е дека во наредниот период во фокусот на соработката треба да бидат економијата и инвестициите.
На интерес на соговорниците, претседателот Иванов ги запозна со актуелните политички и економски состојби во Република Македонија. На средбите беше разговарано и за состојбите во евроатлантските интеграции на Република Македонија, како и за претстојниот НАТО самит во Велс. Беше договорена динамика на средби и размена на посети во наредниот период.
Иванов во разговорите со Емирот на Државата Катар размени информации и мислења за развојот на билатералните односи, при што е договорена размена на посети во наредниот период со цел давање на дополнителен импулс во соработката.
За можностите за јакнење на билатералните односи и соработка, претседателот Иванов разговараше и со претседателот на Казахсатан, Назарбаев.