Средба на раководството на СДСМ со претставникот на генералниот секретар на ООН Дју

Скопје, 18 септември 2014 (МИА) - Претседателот на СДСМ, Зоран Заев, заменик претседателката, Радмила Шекеринска и генералниот секретар Оливер Спасовски денеска се сретнаа со претставникот на Генералниот секретар на ООН и раководител на канцеларијата на ООН во Белград, Питер Н. Дју.

На средбата се разговараше за актуелната политичка и безбедносна состојба во државата.

Според соопштението од СДСМ, претставникот на генералниот секретар на ООН посебно се интересирал за капацитетите за решавање на политичката криза и го акцентирал како важно создавањето демократски амбиент во којшто ќе се решат сите отворени прашања. Заев ги објаснил 5-те теми за разговор што ги бара опозицијата во преговорите со власта и коишто се темелат на препораките на ОБСЕ/ОДИХР. 

- Клучно за граѓаните на Македонија, за државата и за демократијата во земјава е да се обезбедат гаранции за практичната примена на евентуално договореното, што е единствено можно со споделување на одговорноста помеѓу власта и опозицијата при неговата реализација, навел на средбата Заев.

Претставникот на Бан Ки Мун, Питер Н.Дју, се интересирал и за меѓуетничките односи во земјава и порачал дека за иднината на Македонија од големо значење се евро-атлантските перспективи.

Раководството на партијата соопштило дека Социјалдемократскиот сојуз е посветен на препораката за почеток на преговорите со Европската Унија во овогодинешниот Извештај и оти останува определен кон овие стратешките цели за државата.