Скопје, 18 септември 2014 (МИА) - Осум села за кои се издаваат лични документи, а кои досега не биле опфатени со територијалната поделба од 2004 година, ќе бидат вметнати во Законот за територијална организација на локалната самоуправа.
Ова го предвидуваат измените на Законот за територијална организација на локалната самоуправа кои веќе се во собраниска процедура.
Измените се однесуваат на седум општини и тоа Велес, Куманово, Пехчево, Гази Баба, Ѓорце Петров, Тетово и Новаци.
Покрај ова, поради проблем во издавањето на личните документи се предлагаат и технички корекции на имињата на некои села.
Ресорниот министер Лирим Шабани денеска на прес конфернција истакна дека измените се направени на барање на граѓаните и оти со предложените измени не се прави промена на општинските граници.
- Се работи за села кои постојат повеќе од 100 години, а поради некоја случајност не се ставени во Законот кога е донесен законот. Доколку произлезат амандмани кои се во функција на граѓаните и нивното полесно функцонирање, ќе бидат земени предвид, нагласи Шабани.
Со цел да се поттикне економскиот развој во општините, Министерството за локална смаоуправа ќе почне со реализација на нов проект, односно ќе отвора бизнис центри и мрежи за инклузивен развој во осумте региони.
Во Скопскиот, Полошкиот, Источниот и во Југозападниот плански регион ќе бидат отворени центри за поддршка на приватниот сектор, а за нивно функционирање обезбедени се по околу 30 илјади долари за секој посебно.
Во Вардарскиот, Североисточниот и во Пелагонискиот регион ќе бидат воспоставени мрежи за инклузивен развој, односно станува збор за институционални партнерства меѓу локалната власт, бизнис и граѓанскиот сектор.