Скопје и неговите граѓани денеска ја одбележаа „Европската недела без автомобили“ и многумина од нив утрово пристигнаа на своите работни места со помош на велосипедот.
Убавото сончево време и желбата за рекреација, но и совеста кон екологијата и зачувувањето на животната средина во која живееме беа пресудни Македонците да бидат дел од неделата без автомобили. За поздравување е фактот дека користењето на велосипедот како превозно средство е се поприфатен помеѓу граѓаните, па да се надеваме дека во иднина луѓето се повеќе ќе возат велосипед, а помалку автомобил, барем за кратките дестинации.
Инаку, вработените во Македонски Телеком и Т-Мобиле Македонија се вклучија кон акцијата „Европска недела без автомобили“ координирана од Министерството за животна средина, односно не користеа автомобил туку возеа велосипед, пешачеа или го користеа јавниот превоз.
- Оваа акција има за цел да нè поттикне на размислување во една апсолутно исправна насока на зачувување на сопственото здравје и заштита на животната околина. Токму поради тоа, како прв човек на Областа за човечки ресурси но и како спортист, јас би ги повикал нашите колеги што почесто да го оставаат автомобилот дома и до работното место да доаѓаат пеш, со јавен превоз или, пак, со велосипед“.- изјави Лазар Поповски, Главен директор за човечки ресурси, кој утринава возеше велосипед до работното место.
Како поддржувачи на оваа акција и активни учесници и во велосипедската парада и завршна прослава, ја пренесуваме пораката за почиста животна средина и подобро здравје.
Да се надеваме дека ќе расте бројот на луѓето кои ќе го користат велосипедот секојдневно и дека Скопје во иднина ќе заличи на Амстердам и на другите европски градови каде велосипедот важи за главно превозно средство до работа.