Промовирана книгата „Прилози кон историјата на македонската архитектура“

Скопје, 24 октомври 2014 (МИА) - „Матица македонска“ денеска го промовираше изданието „Прилози кон историјата на македонската архитектура“ од архитектот Вангел Божиновски.

Според авторот, книгата е посветена на историјата на македонската архитектура и е пионерски обид да се направи нејзин континуитет од почетокот на цивилизацијата, од неолитот се до 19 век. 

- Се обидувам во оваа книга да го фатам континуитетот на она што значи постојано живеење на еден народ на оваа почва. Оваа книга во суштина покажува дека Македонците никогаш не се отселиле, туку се првите староседелци на овој полуостров. Првите населби, првите куќи во Европа, се подигнати овде и тој континуитет на изразот кој е направен во неолитот, во смисла на архитектонско творештво, во смисла на урбано-просторно планирање, се случува токму овде. Ние сме само корисници на таа древна култура и цивилизација, изјави Божиновски. 

Тој додаде дека прилозите во книгата содржат факти кои укажуваат на множество детали важни воопшто за светското градителство кои, како што рече, на одреден начин аргументираат суштествување на некои елементи од историјата на архитектурата кои прво се применети во Македонија, а потоа претставуваат дел од светското наследство.

Книгата на Божиновски ја претставија архитектот Васил Иљов, писателот Санде Стојчев и проф. Петре Башевски.