Скопје, 27 ноември 2014 (МИА) - СДСМ денеска повторно се осврна на тројното убиство во Злетово што го изврши професионален војник на АРМ обвинувајќи дека власта е виновна за состојбите во Армијата.
Максим Димитриевски, претседател на партиската Комисија за одбрана, изјави дека министерот за одбрана Зоран Јолевски со вчерашната изјава за формирање на Комисија, признал дека има пропусти во правилата и процедурите за работа во АРМ.
- Дали своеволното напуштање на стражарското место од страна на војникот, било уредно пријавено, но не се реагирало навремено? Дали професионалните војници кои се вратени од кризни жаришта во светот имаат соодветен здравствен третман или подлежат само на редовен лекарски преглед? Дали е точно дека дел од професионалните војници немаат конкретни работни задолженија, туку работат што ќе им се нареди, праша Димитриевски.
Тој обвини дека платата на професионалните војници е околу 300 евра и оти повеќе од два месеца им доцнат средствата на војниците за закупнина.
СДСМ повторно побара неотповикливи оставки од министерот за одбрана и началникот на Генералштабот на АРМ, а, како што вели, доколку тоа не го сторат самите, тогаш да бидат разрешени од страна на Владата и претседателот на државата.