Партиски реакции по обраќањето на претседателот Иванов

Скопје, 18 декември 2014 (МИА) - Претседателот Ѓорге Иванов го надминува прагот на политичко соперништво, се поставува како голем државник и како претседател на сите граѓани, изјави денеска Антонио Милошоски, потпретседател на Собранието и пратеник од ВМРО-ДПМНЕ, по годишното обраќање на претседателот во Собранието.

- Со својата работа во изминативе пет години се уверивме дека се работи за стабилен политичар, одмерен човек со принципи кој што влева сигурност дека функцијата претседател е во сигурни раце. Претседателот Иванов го надминува прагот на политичко соперништво, се поставува како голем државник и како претседател на сите граѓани. Односот на непочитување кон институцијата претседател на државата и од страна на ДУИ и од страна на СДСМ најдобрата реплика ја има во изборот на граѓаните на Република Македонија, истакна Милошоски. 

Пратеникот Артан Груби од ДУИ рече дека нивното неприсуство на обраќањето на Иванов говори јасно за непроменливоста на ставот на втората мнозинска заедница во Република Македонија кон неговиот легитимитет.

- Истовремено, неговото обраќање во присуство на монопартиска публика говори гласно за оправданоста на нашето делување за време на претседателските избори, рече Груби.