„Повелба на Република Македонија“ за Еврејската заедница

Скопје, 19 декември 2014 (МИА) - Претседателот Ѓорге Иванов вечер во Македонската академија на науките ќе го додели признанието „Повелба на Република Македонија“ на Еврејската заедница во РМ.

Повелбата и се доделува на Еврејската заедница за долгогодишната работа и дејствување во Република Македонија, со што даде значаен придонес во градењето на македонскиот модел на соживот и демократското општество, како и за поддршката и унапредувањето на односите и соработката со Државата Израел, соопшти кабинетот на претседателот Иванов.

Доделувањето на признанието на Еврејската заедница е во рамки на дводневната Меѓународна научна конференција „Евреите во Македонија: Историја, традиција, култура, јазик и религија“, што се одржува по повод 70 години од возобновувањето на работата на Еврејската заедница во Македонија.