Најавени повеќе културни активности во Крива Паланка во 2015Крива Паланка, 26 јануари 2015 (МИА) - Голем број културни активности од манифестации, изложби, фестивали, одбележување на празници, проекти за зачувување на културното наследство и богатство, културна размена и други настани ќе реализира општина Крива Паланка во рамки на Програмата за култура за 2015 година.
- Културните активности во Крива Паланка се реализираат преку три програми, за култура на општината, за одбележување празници, настани и манифестации, и за работа на Градскиот музеј, посочува Драган Величковски, директор на ЛУ Градски музеј Крива Паланка.
За реализација на планираните програмски активности предвидени се околу 7 милиони денари. Богатата културна активност има за цел да се сочува континуитетот на традиционалните културно-уметнички манифестации, унапредувањето на меѓународната културна комуникација, соработката за развој на културата и учеството на локалните институции во што поголем број културни проекти. Како позначајни културни и традиционални манифестации се издвојуваат Меѓународниот театарски фестивал и Интернационалниот фолклорен фестивал „Св.Јоаким Осоговски“, музичкиот фестивал „JOY FEST“, Невестинското поклонение на „Свети Теодор Тирон“ , Џип релито на Осоговските Планини, копаничарската и ликовна колонија кои се одржуваат во Осоговскиот манастир и друго.
- Значајни активности се предвидени и од страна на Градскиот музеј, кој годинава ќе биде посветен на проектите за заштита и валоризација на културно-историското наследство, стимулирање на локалното производство на сувенири, откуп на музејски предмети, археолошки истражувања, снимање на документарни етно-историски филмови, градителското наследство и други активности, истакнува Величковски.
Средствата за реализација на културните содржини во рамки на општината во најголем дел ќе бидат обезбедени од општинскиот буџет, додека планираните проектни активности за работа на Градскиот музеј се очекува да бидат поддржани од Министерството за култура и од други донатори.
|